Wheat Scam in Punjab : ਲੁਧਿਆਣਾ ਅਦਾਲਤ ਨੇ ਅੱਜ ਇੱਕ ਕਣਕ ਘੁਟਾਲੇ ‘ਚ 17 ਦੋਸ਼ੀਆਂ ਨੂੰ ਸਜ਼ਾ ਦਾ ਫੈਸਲਾ ਸੁਣਾਇਆ ਹੈ। ਅਦਾਲਤ ਨੇ ਫੈਸਲੇ ਦੌਰਾਨ 13 ਨੂੰ 5-5 ਸਾਲ ਦੀ ਸਜ਼ਾ, ਜਦਕਿ 4 ਨੂੰ 4-4 ਸਾਲ ਦੀ ਸਜ਼ਾ ਸੁਣਾਈ।

ਜਾਣਕਾਰੀ ਅਨੁਸਾਰ, ਇਹ ਮਾਮਲਾ 2021 ਦਾ ਏਪੀਐਲ ਕਣਕ (APL Scheme) ਦਾ ਹੈ, ਜਿਸ ਵਿੱਚ ਸਪੈਸ਼ਲ ਜੱਜ ਅਮਰਿੰਦਰ ਸਿੰਘ ਸ਼ੇਰਗਿੱਲ ਨੇ ਫੈਸਲਾ ਸੁਣਾਇਆ। ਇਸਤੋਂ ਪਹਿਲਾਂ 23 ਮਾਰਚ ਨੂੰ ਸਾਰੇ ਮੁਲਜ਼ਮਾਂ ਨੂੰ ਦੋਸ਼ੀ ਕਰਾਰ ਦਿੱਤਾ ਗਿਆ ਸੀ।

ਇਸ ਮਾਮਲੇ ਵਿੱਚ ਕੁੱਲ 30 ਦੋਸ਼ੀ ਸਨ, ਜਿਨ੍ਹਾਂ ਵਿੱਚੋਂ 17 ਦੋਸ਼ੀ ਕਰਾਰ ਦਿੱਤੇ ਗਏ ਹਨ। 6 ਨੂੰ ਬਰੀ ਕਰ ਦਿੱਤਾ ਗਿਆ ਸੀ, ਜਦਕਿ 5 ਦੀ ਸੁਣਵਾਈ ਦੌਰਾਨ ਮੌਤ ਹੋ ਗਈ ਹੈ ਅਤੇ 1 ਦੋਸ਼ੀ ਨੂੰ ਭਗੌੜਾ ਐਲਾਨਿਆ ਗਿਆ ਹੈ। 1 ਵਿਰੁੱਧ ਕਾਰਵਾਈ ਪੂਰੀ ਹੋ ਗਈ ਹੈ।

ਕਿਨ੍ਹਾਂ ਨੂੰ ਹੋਈ ਸਜ਼ਾ ?

ਅਦਾਲਤ ਨੇ 13 ਦੋਸ਼ੀਆਂ ਨੂੰ 5-5 ਸਾਲ ਦੀ ਸਜ਼ਾ ਸੁਣਾਈ ਹੈ, ਜਿਨ੍ਹਾਂ ਵਿੱਚਸੁਭਾਸ਼ ਚੰਦਰ ਉਰਫ ਸੁਭਾਸ਼ ਚੰਦ ਗਰਗ (ਸ਼ਾਂਤੀ ਫਲੋਰ ਐਂਡ ਜਨਰਲ ਮਿੱਲ, ਜੁਗੀਆਣਾ), ਆਸ਼ੂਤੋਸ਼ ਗੋਇਲ (ਪੀ.ਵੀ. ਟਰੇਡਿੰਗ ਕੰਪਨੀ, ਅਹਿਮਦਗੜ੍ਹ), ਪ੍ਰਿੰਸ ਸੋਨੀ, ਰਜਿੰਦਰ ਕੁਮਾਰ, ਪ੍ਰਦੀਪ ਕੁਮਾਰ, ਕੁਲਵੀਰ ਸਿੰਘ, ਨਰੇਸ਼ ਕੁਮਾਰ, ਜਾਵੇਦ ਅਲੀ, ਪ੍ਰਗਟ ਸਿੰਘ, ਓਮ ਪ੍ਰਕਾਸ਼, ਸ਼ਕਤੀ ਕੁਮਾਰ, ਪਰਵੀਨ ਕੁਮਾਰ, ਹਰਦੀਪ ਕੁਮਾਰ ਸ਼ਾਮਲ ਹਨ। ਜਦਕਿ 4-4 ਸਜ਼ਾ ਵਿੱਚਵਿੱਚ ਜਤਿੰਦਰ ਕੁਮਾਰ, ਲਲਿਤ ਅਗਰਵਾਲ, ਚੰਦਰ ਕਾਂਤਾ ਅਤੇ ਲਕਸ਼ਮੀ ਗੋਸਾਈਂ ਸ਼ਾਮਲ ਹਨ। ਇਸਤੋਂ ਇਲਾਵਾ ਸੰਜੇ ਗਰਗ (ਸ਼ਾਂਤੀ ਫਲੋਰ ਮਿੱਲ ਨਾਲ ਜੁੜੇ), ਰਿਸ਼ੀ ਸਿੰਗਲਾ, ਅਨਿਲ ਕੁਮਾਰ ਟੰਡਨ, ਅਨਿਲ ਕੁਮਾਰ, ਸੰਜੇ ਅਤਰੀ ਅਤੇ ਸੁਰਿੰਦਰ ਗੋਇਲ ਨੂੰ ਬਰੀ ਕਰ ਦਿੱਤਾ ਗਿਆ ਹੈ।

ਕੀ ਹੈ ਪੂਰਾ ਮਾਮਲਾ ?

ਜ਼ਿਕਰਯੋਗ ਹੈ ਕਿ ਪੰਜਾਬ ਵਿਜੀਲੈਂਸ ਬਿਓਰੋ ਨੇ ਇਹ ਮਾਮਲਾ ਦਰਜ ਕੀਤਾ ਸੀ, ਜਿਸ ਦੌਰਾਨ ਜਾਂਚ ‘ਚ ਸਾਹਮਣੇ ਆਇਆ ਸੀ ਕਿ ਪਨਗਰੇਨ ਦੇ ਮਾਛੀਵਾੜਾ ਸਾਹਿਬ ਗੋਦਾਮ ਵਿਚੋਂ 1100 ਤੋਂ ਵੱਧ ਗਰੀਬਾਂ ਨੂੰ ਮਿਲਣ ਵਾਲੀ ਸਰਕਾਰੀ ਕਣਕ ਦੀਆਂ ਬੋਰੀਆਂ ਨੂੰ ਫਰਜ਼ੀ ਢੰਗ ਨਾਲ ਗੇਟ ਪਾਸ ਨਾਲ ਗੋਦਾਮ ਵਿਚੋਂ ਕੱਢਿਆ ਗਿਆ ਅਤੇ ਫਿਰ ਪ੍ਰਾਈਵੇਟ ਮਿੱਲਾਂ ਨੂੰ ਵੇਚ ਦਿੱਤਾ ਗਿਆ।

ਵਿਜੀਲੈਂਸ ਜਾਂਚ ਵਿੱਚ ਸਰਕਾਰੀ ਅਧਿਕਾਰੀਆਂ ਅਤੇ ਨਿੱਜੀ ਵਿਅਕਤੀਆਂ ਵਿਚਕਾਰ ਮਿਲੀਭੁਗਤ ਪਾਈ ਗਈ। ਕਣਕ ਨੂੰ ਜਾਅਲੀ ਦਸਤਾਵੇਜ਼ਾਂ ਦੀ ਵਰਤੋਂ ਕਰਕੇ ਢੋਆ-ਢੁਆਈ ਕੀਤੀ ਗਈ ਸੀ। ਯੋਗ ਪਰਿਵਾਰਾਂ ਨੂੰ ਵੰਡਣ ਦੀ ਬਜਾਏ, ਇਸਨੂੰ ਨਿੱਜੀ ਲਾਭ ਲਈ ਵੇਚ ਦਿੱਤਾ ਗਿਆ ਸੀ।

– PTC NEWS