Cyber ​​Fraud:ਫ਼ਾਜ਼ਿਲਕਾ ਦੇ ਪਿੰਡ ਝੰਗੜ ਭੈਣੀ ਦੀ ਇੱਕ ਢਾਣੀ ਵਿੱਚ ਰਹਿਣ ਵਾਲੇ ਗਰੀਬ ਕਿਸਾਨ ਪਰਿਵਾਰ ਨਾਲ ਸਾਈਬਰ ਠੱਗਾਂ ਨੇ ਅਜਿਹਾ ਧੋਖਾ ਕੀਤਾ ਹੈ ਕਿ ਸੁਣ ਕੇ ਹਰ ਕੋਈ ਹੈਰਾਨ ਰਹਿ ਜਾਵੇਗਾ। ਮਸ਼ਹੂਰ ਪੰਜਾਬੀ ਗਾਇਕ ‘ਮਨਕੀਰਤ ਔਲਖ’ ਬਣ ਕੇ ਇੱਕ ਠੱਗ ਨੇ ਇਸ ਭੋਲੇ-ਭਾਲੇ ਪਰਿਵਾਰ ਨੂੰ 5 ਲੱਖ ਰੁਪਏ ਦੀ ਮਦਦ ਦਾ ਝਾਂਸਾ ਦਿੱਤਾ ਅਤੇ ਬਦਲੇ ਵਿੱਚ ਉਨ੍ਹਾਂ ਦੀ ਛੋਟੀ ਬੱਚੀ ਦੀ ਗੋਲਕ ਤੁੜਵਾ ਕੇ 8100 ਰੁਪਏ ਠੱਗ ਲਏ।

ਪੀੜਤ ਰੇਸ਼ਮ ਸਿੰਘ ਨੇ ਭਰੇ ਮਨ ਨਾਲ ਦੱਸਿਆ ਕਿ ਉਨ੍ਹਾਂ ਨੂੰ ਲਗਾਤਾਰ ਇੱਕ ਨੰਬਰ ਤੋਂ ਫੋਨ ਆ ਰਿਹਾ ਸੀ। ਫੋਨ ਕਰਨ ਵਾਲਾ ਖੁਦ ਨੂੰ ਗਾਇਕ ਮਨਕੀਰਤ ਔਲਖ ਦੱਸ ਰਿਹਾ ਸੀ। ਉਸਨੇ ਰੇਸ਼ਮ ਸਿੰਘ ਦੇ ਘੱਟ ਪੜ੍ਹੇ-ਲਿਖੇ ਪੁੱਤਰ ਨਾਲ ਗੱਲ ਕੀਤੀ ਅਤੇ ਕਿਹਾ ਕਿ ਉਹ ਉਨ੍ਹਾਂ ਦੇ ਮਾੜੇ ਹਾਲਾਤਾਂ ਨੂੰ ਦੇਖਦੇ ਹੋਏ ਵਿਦੇਸ਼ ਤੋਂ ਡਾਲਰ ਭੇਜ ਕੇ ਉਨ੍ਹਾਂ ਦੀ 5 ਲੱਖ ਰੁਪਏ ਦੀ ਆਰਥਿਕ ਮਦਦ ਕਰਨਾ ਚਾਹੁੰਦਾ ਹੈ।

ਠੱਗ ਨੇ ਪਰਿਵਾਰ ਦਾ ਭਰੋਸਾ ਜਿੱਤਣ ਲਈ ਵਟਸਐਪ ‘ਤੇ ਵੀਡੀਓ ਕਾਲ ਵੀ ਕੀਤੀ। ਪਰਿਵਾਰ ਨੇ ਦੱਸਿਆ ਕਿ ਉਸਨੇ ਆਪਣੇ ਚਿਹਰੇ ‘ਤੇ ਸਾਫ਼ਾ (ਪਰਨਾ) ਬੰਨ੍ਹਿਆ ਹੋਇਆ ਸੀ ਅਤੇ ਸਿਰਫ਼ ਅੱਧਾ ਮੂੰਹ ਹੀ ਦਿਖਾ ਰਿਹਾ ਸੀ। ਜਦੋਂ ਪਰਿਵਾਰ ਨੇ ਪੂਰਾ ਚਿਹਰਾ ਦਿਖਾਉਣ ਲਈ ਕਿਹਾ ਤਾਂ ਉਹ ਟਾਲ-ਮਟੋਲ ਕਰ ਗਿਆ। ਠੱਗ ਨੇ ਕਿਹਾ ਕਿ ਪੈਸੇ ਟਰਾਂਸਫਰ ਕਰਨ ਲਈ ਇੱਕ ਮੈਡਮ ਨਾਲ ਗੱਲ ਹੋਵੇਗੀ ਅਤੇ ਟੈਕਸ/ਫੀਸ ਵਜੋਂ ਪਹਿਲਾਂ 8100 ਰੁਪਏ ਉਨ੍ਹਾਂ ਦੇ ਖਾਤੇ ਵਿੱਚ ਪਾਉਣੇ ਪੈਣਗੇ, ਜਿਸਤੋਂ ਬਾਅਦ ਸ਼ਾਮ ਤੱਕ 5 ਲੱਖ ਰੁਪਏ ਆ ਜਾਣਗੇ।

5 ਲੱਖ ਦੀ ਆਸ ‘ਚ ਬੱਚੀ ਦੀ ਗੋਲਕ ਵੀ ਧੋਖਾਧੜੀ ਦਾ ਸ਼ਿਕਾਰ ਹੋਈ

ਹੜ੍ਹਾਂ ਦੀ ਮਾਰ ਝੱਲ ਚੁੱਕੇ ਅਤੇ ਗਰੀਬੀ ਨਾਲ ਜੂਝ ਰਹੇ ਇਸ ਪਰਿਵਾਰ ਨੇ 5 ਲੱਖ ਮਿਲਣ ਦੀ ਆਸ ਵਿੱਚ ਆਪਣੀ ਛੋਟੀ ਬੱਚੀ ਦੀ ਗੋਲਕ (ਬੁਗਣੀ) ਭੰਨ ਦਿੱਤੀ, ਜਿਸ ਵਿੱਚ ਉਨ੍ਹਾਂ ਨੇ ਧੀ ਦੇ ਭਵਿੱਖ (ਗਹਿਣੇ ਜਾਂ ਪੜ੍ਹਾਈ) ਲਈ ਪੈਸੇ ਜੋੜੇ ਸਨ। ਪਿਓ-ਪੁੱਤ ਨੇ ਪੈਸੇ ਇਕੱਠੇ ਕਰਕੇ ਠੱਗ ਦੇ ਦੱਸੇ ਖਾਤੇ ਵਿੱਚ ਪਾ ਦਿੱਤੇ, ਪਰ ਉਸ ਤੋਂ ਬਾਅਦ ਨਾ ਤਾਂ 5 ਲੱਖ ਆਏ ਅਤੇ ਨਾ ਹੀ ਉਸ ਨਕਲੀ ਮਨਕੀਰਤ ਔਲਖ ਦਾ ਫੋਨ ਕਦੇ ਦੁਬਾਰਾ ਲੱਗਿਆ।

ਰੇਸ਼ਮ ਸਿੰਘ ਨੇ ਦੱਸਿਆ ਕਿ ਇਸ ਘਟਨਾ ਨੂੰ ਦੋ ਮਹੀਨੇ ਬੀਤ ਚੁੱਕੇ ਹਨ ਅਤੇ ਪੈਸੇ ਜਾਣ ਦਾ ਉਨ੍ਹਾਂ ਨੂੰ ਡੂੰਘਾ ਸਦਮਾ ਲੱਗਿਆ ਹੈ। ਉਨ੍ਹਾਂ ਨੇ ਸਰਕਾਰ ਅਤੇ ਆਮ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਅਜਿਹੇ ਫੋਨ ਕਾਲਾਂ ਤੋਂ ਬਚਣ। ਉਨ੍ਹਾਂ ਕਿਹਾ, “ਕਿਸੇ ਦੀਆਂ ਮਿੱਠੀਆਂ ਗੱਲਾਂ ਵਿੱਚ ਆ ਕੇ ਪੈਸੇ ਨਾ ਪਾਓ, ਅਸੀਂ ਤਾਂ ਮਾਰੇ ਗਏ, ਪਰ ਹੋਰ ਕੋਈ ਗਰੀਬ ਇਨ੍ਹਾਂ ਦੇ ਜਾਲ ਵਿੱਚ ਨਾ ਫਸੇ।”

– PTC NEWS